ՍԻՆԵՍԿՈՊ

«Շրջմոլիկը», Սիմաո Կայատե, 2022

Ֆիլմի իրադարձությունները տեղի են ունենում երկու հազար տասականների սկզբին` ֆինանսական ճգնաժամի տարիներին: Տասներեք տարեկան Անդրեն ապրում է Պորտուգալիայի Ալենժու շրջանում: Հասակակիցների հետ շփվելու փոխարեն` օգնում է հորը ջրհորներ փորելու գործում: Մի օր հայրն անհետանում է, տղային միայնակ թողնելով: Փորձելով գտնել նրան Անդրեն, ստիպված դիմում է Սանդրային` գրեթե անծանոթ հարևանուհուն: Թվում է, թե ֆիլմը վերածվելու է որոնողական ռոուդ մուվիի` Ուլթեր Սալեսի «Կենտրոնական կայարանի» մոտիվներով: Բայց Սիմաո Կայատեի «Շրջմոլիկը» այդ ճանապարհով չի գնում. ոչ մի մոգական ռեալիզմ, միայն տխուր, տաղտկալի իրականություն:

Կարդալ ավելին

«Կախարդական լեռ», Մարիամ Չաչիա, Նիք Վոյթ, 2023

Վրաստանում աշխատող ռեժիսորների տանդեմի` Մարիամ Չաչիայի և Նիք Վոյթի «Կախարդական լեռ» ֆիլմը պոետիկ և քաղաքական կինոյի տպավորիչ նմուշ է: Սա ծայրահեղ անձնական պատմություն է` կապված ռեժիսորներից մեկի տրավմատիկ փորձառության հետ: Տարիներ առաջ Մարիամ Չաչիայի մոտ տուբերկուլոզ էին ախտորոշել. մեծ հավանականություն կար, որ նրան կտեղափոխեն Աբասթումանի` Վրաստանի հեռավոր սարերում մեկուսացված հիվանդանոց: Մարիամը, բարեբախտաբար, առանց դրա էլ ապաքինվեց, բայց հիվանդանոցի ուրվականը սկսեց հետապնդել նրան մղձավանջներում: Տարիներ անց նա իր մեջ ուժ է գտնում և համառեժիսոր Նիք Վոյթի հետ մեկնում Աբասթումանի, որպեսզի հաղթահարի իր վախերը:

Կարդալ ավելին

«Սաբայա» կինոթատրոնը, Օրիթ Ֆոուքս Ռոթեմ, 2021

Թել Ավիվցի ռեժիսոր Ռոնան վիդեովավերագրության դասեր է անցկացնում արաբ և հրեա կանանց համար: Մասնակիցներից յուրաքանչյուրը  ստանում է թվային տեսախցիկ և տարբեր հանձնարարություններ` նկարելու իր տունը, հարազատներին, անձնական տարածքը: Ժամանակի ընթացքում Ռոնան այնքան է խորասուզվում ուսանողների կյանքի մեջ, որ որոշում է նրանց վիդեո-պատմություններից ֆիլմ-խճանկար ստեղծել: 

Կարդալ ավելին

Պահմտոցի (Վիկտորյա Ֆիորե, 2022)

«Պահմտոցին» շուրջ չորս տարվա նկարահանումների արդյունք է: Ռեժիսոր Վիկտորիա Ֆիորեն հետևում է դպրոցական տարիքի մի տղայի` Էնթոնիի կյանքին: Նա բնակվում է Նեապոլի իսպանական թաղամասում՝ վտանգավոր, քրեածին միջավայրում, ուր պայթյունի ձայնը նույն հաջողությամբ կարող է նշանակել և՛ հրավառություն, և՛ ատրճանակի կրակոց: Փողոցների նեղվածքը, բաց տարածքների բացակայությունը երեխաներին զրկում են անգամ ֆուտբոլ խաղալու բերկրանքից: Մնում է միայն թափառել, լքված շենքերում ժամանակ սպանել, մանր զանցանքներ գործել:

Կարդալ ավելին

Կին. լռության օրենքը (Ֆրանչեսկո Կոստաբիլե, 2022)

Իտալական կինոն շարունակում է հետազոտել քրեական աշխարհը: Ռեժիսոր Ֆրանչեսկո Կոստաբիլեի խաղարկային դեբյուտը` «Կին. լռության օրենքը» նվիրված է նդրանգետայի բոլոր զոհերին և բոլոր ըմբոստ կանանց: Ռոզայի ընտանիքն ապրում է խուլ բնակավայրում, ուր ամեն ինչ վերահսկում է նդրանգետան` կալաբրիական կազմակերպված հանցավոր խմբավորումը: Մաֆիայի օրենքներն անառարկելի են: Երիտասարդ հերոսուհուն հետապնդում է անցյալի ուրվականը` մոր մահվան հետ կապված սարսափելի  ընտանեկան գաղտնիքը: Նա փորձում է դուրս գալ արատավոր շրջանից, սկսում է իր պայքարը սեփական ընտանիքի ու ողջ դաժան համակարգի դեմ: 

Կարդալ ավելին

Վերջին «Սիրելի Բուլղարիան» (Ալեքսեյ Ֆեդորչենկո, 2021)

Հայրենական մեծ պատերազմի թեժ փուլում՝ 1943 թվականին, երիտասարդ կենսաբանը հայտնվում է Ալմա-Աթայում՝ խնձորի նոր տեսակ բուծելու հանձնարարականով: Այնտեղ նա գտնում է իր սիրելի գրող Սեմյոն Կուրոչկինի օրագրերն ու խորասուզվում նրա հիշողությունների, մտորումների մեջ: Ռեժիսոր Ալեքսեյ Ֆեդորչենկոն երկար տասնամյակներ է փայփայել այս նախագծի գաղափարը: «Վերջին «Սիրելի Բուլղարիան» հիմնվում է խորհրդային մեծ գրող Միխայիլ Զոշչենկոյի ինքնակենսագրականի վրա (Սեմյոն Կուրոչկինը նրա բազմաթիվ կեղծանուններից մեկն է): 

Կարդալ ավելին

Անատոմիա (Օլա Յանկովսկա, 2021)

Երկարամյա բացակայությունից հետո Միկան վերադառնում է Վարշավա,որպեսզի հոգ տանի ծանր հիվանդ հոր համար: Դեռ տարիներ առաջ տեղի ունեցած պատահարի պատճառով հայրը կորցնում է հիշողությունը, ասես անցյալում հայտնվում. նրա համար դուստրը դեռահաս է, վաղուց մահացածները` կենդանի: Թվում է, թե Օլա Յանկովսկայի «Անատոմիա» ֆիլմը կենտրոնանալու է հոր և դստեր հարաբերությունների վրա: Բայց շոշափվող թեմաների շրջանակը շատ ավելի լայն է: Հայրենի տուն վերադարձն արթնացնում է մանկության ու պատանեկության հիշողությունններ, որոնք սակայն չեն համընկնում փոփոխված իրականության հետ: Քաղաքը լրիվ այլ տեսք ունի, հին ընկերներն ու սիրեկանները վերածվել են անծանոթների: Հերոսուհին չի գտնում իր ինքնությունը:

Կարդալ ավելին